Fréttir FSH

Næstu daga verður mikið líf og fjör í skólanum þar sem þema- og Dillidagar hefjast mánudaginn 27. febrúar.  Nemendur munu vinna að þemaverkefnum sem bera yfirskriftina Okkar samfélag - okkar framtíð.  Góðir gestir munu heimsækja skólann og leiðbeina nemendum. Goddur (Guðmundur Oddur Magnússon prófessor við Listaháskóla Íslands) verður með erindi á sal skólans mánudaginn 27. febrúar kl. 09.00 og Ágúst Ólafsson frétta- og dagskrárgerðarmaður hjá RÚV flytur erindi á sal skólans þriðjudaginn 28. febrúar á sama tíma. Gestum er velkomið að koma í skólann og hlýða á erindin. 
Fimmtudaginn 1. mars verður OPIÐ HÚS í skólanum frá kl. 16.00-18.00 og munu nemendur þá kynna niðurstöður sínar gestum og gangandi.  Alla daga vikunnar munu nemendur standa fyrir smiðjum og viðburðum af ýmsu tagi, nokkir þeirra eru opnir öllum - sjá nánar dagskrá Dillidaga hér. Dillidögum lýkur með glæsilegri árshátíð skólans sem haldin verður í sal Borgarhólsskóla föstudaginn 2. mars.

Nemendur Reykjahlíðarskóla sóttu skólann heim sl. fimmtudag. Eftir að hafa fengið kynningu á námsframboði og félagslífi skólans kíktu gestirnir í kennslustundir og fylgdust þar með nemendum og kennurum að störfum. Þá fengu allir tækifæri til þess spreyta sig í hinum ýmsum þrautum í boði stjórnar nemendafélagsins. Það var sérstaklega ánægjulegt að fá þennan glæsilega nemendhóp í heimsókn og vonum við að gestirnir hafi haft bæði gagn og gaman af. Hér má sjá myndir.

Nemendur í afreksíþróttum fengu góðan gest s.l. miðvikudag en þá kom Rúnar Kristinsson þjálfari mfl. KR í heimsókn og var með æfingu og fræðslu.  Rúnar er leikjahæsti landsliðsmaður Íslands í knattspyrnu og núverandi þjálfari KR, en félagið varð bæði Íslands- og bikarmeistari á síðasta ári undir hans stjórn.

Rúnar var með góða og áhugaverða æfingu í Höllinni þar sem farið var yfir ýmsar tækni- og leikskipulagsæfingar. Að lokinni æfingu flutti hann fræðsluerindi í sal Framsýnar og fór þar yfir ýmsa þætti varðandi þjálfun og keppni í knattspyrnu. Hópurinn var mjög ánægður með heimsóknina og lýsti Rúnar yfir ánægju sinni með það hversu marga efnilega og góða knattspyrnuiðkendur Völsungur hefði í sínum röðum.

Í gær kíktu í heimsókn læknanemar, af öðru ári, á vegum Ástráðs sem er forvarnastarf læknanema. Hefð er fyrir því að læknanemarnir heimsæki nýnema í framhaldsskólum hér sem og á landsvísu þar sem áhersla er lögð á fræðslu um kynsjúkdóma, getnaðarvarnir og fóstureyðingar. Svo skemmtilega vildi til að nemarnir voru mjög kunnuglegir að þessu sinni enda ættaðir héðan þ.e. Stefán Þórsson Gettu betur og Útsvarsstjarna og Ástríður Pétursdóttir úr Mývatnssveit. Nýnemarnir voru mjög ánægðir með þá fræðslu sem þeir fengu og skemmtu sér vel.

Innritun nemenda með fötlun á starfsbrautir framhaldsskóla, fer fram fyrr en innritun almennt í framhaldsskóla. Innritað verður frá 30. janúar til 29. febrúar 2012. Tímamörk almennrar innritunar gilda þó fyrir þær umsóknir sem berast seinna.