Fréttir FSH

Framhaldsskólinn á Húsavík óskar nemendum sínum, starfsfólki, velunnurum og landsmönnum öllum
Gleðilegra Jóla og farsældar á nýju ári.

Í dag lauk haustönninni með síðasta umsjónartíma og prófsýningu. Fimm nemendur luku stúdentsprófi og munu útskrifast formlega með félögum sínum í vor. Þessir nemendur eru: Guðrún Einarsdóttir, Karl Hannes Sigurðsson, Grétar Björnsson, Heiðar Halldórsson og Alma Lilja Ævarsdóttir en hana vantar á myndina.

Eins og við erum flest búin að frétta þá komst Ína Valgerður okkar áfram í Idolinu á föstudaginn. Fjölmennt var á Fosshótel Húsavík þetta kvöld og var mikill fögnuður, þegar í ljós kom að Ína Valgerður hefði fengið næst flest atkvæði.

Nú er komið út fréttablað starfsbrautar FSH sem nefnist Dálkurinn. Blaðið er glæsilegt 10 síðna litprentað blað. Nemendur á starfsbraut hafa verið að vinna að blaðinu í vetur sem hluta af íslenskunámi sínu.   Nokkur fyrirtæki í bænum hafa styrkt útgáfu blaðsins og með því gert hana mögulega.

Í tilefni af 1. des. komu nemendur og kennarar hér í skólanum saman í löngufrímínútunum í morgun og æfðu ættjarðarlög. Eftir hádegið kl. 13:00 komu nemendur allrar skólanna á Húsavík saman í íþróttahöllinni og héldu upp á daginn með upplestri og söng.

Nemendur í áfanganum lífsleikni hafa unnið mörg fjölbreytt verkefni á þessari haustönn.  Eitt af síðustu verkefnum sem nemendur gerðu var að semja kynningarbæklinga um ýmsilegt sem tengist  Húsavík.  Vel tókst til og afraksturinn varð að útbúnir voru 6 kynningarbæklingar.

Nemendur í félagsfræði 103 ásamt Arnfríði Aðalsteinsdóttur kennara sínum brugðu sér af bæ í dag og heimsóttu skrifstofu stéttarfélaganna. Tilgangurinn var að fræðast um helstu hagsmunasamtök á íslenskum vinnumarkaði og hvaða hlutverki þau gegna.

Einn af nemendum okkar, Stefán Jón Sigurgeirsson er mikill skíðamaður og er nú að fara í 4ra vikna æfingabúðir til  Geilo í Noregi. Hann fer þangað með úrvalshópi  unglinga á aldrinum 15-18 ára frá Skíðafélagi Akureyrar en þjálfari þeirra er Fjalar Úlfarsson.

Miðvikudaginn 16. nóvember er dagur íslenskrar tungu. Það er fæðingardagur Jónasar Hallgrímssonar. Hér í framhaldsskólanum er dagsins minnst eins og í fleiri skólum. Nemendur í íslensku munu eftir löngufrímínútur lesa úr verkum Jónasar á göngum skólans.
Ljóðið Ferðalok
Myndir frá 16. nóv.

Á þessu skólaári er tekin upp sú nýbreytni við FSH að allir nemendur fá svokallað miðannarmat. Það er gefið í heilum tölum eins og aðrar einkunnir skólans. Tilgangur miðannarmats er að auka enn þjónustu við nemendur og aðstandendur þeirra og gefa þeim upplýsingar um stöðu nemandans í hverri námsgrein eftir að námsönn er hálfnuð.